Латвиската авиокомпанија AirBaltic најави значително намалување на својата флота, со што прави голем пресврт во однос на претходните планови за брзо проширување.
Според новиот деловен план, до крајот на 2026 година компанијата планира да располага со 36 авиони Airbus A220-300, во споредба со сегашните 54 летала. Тоа значи намалување од 18 авиони, односно за околу една третина.
Намалувањето нема да биде трајно. Според плановите, флотата би започнала постепено да расте од 2028 година – на 37 авиони во 2028, 39 во 2029, 40 во 2030 и 41 авион во 2031 година.
Новите проекции се значително поинакви од претходниот деловен план, според кој AirBaltic требаше да доживее голема експанзија и до 2031 година да располага со 100 авиони.
Од компанијата објаснуваат дека претходниот план бил изработен пред планираната иницијална јавна понуда на акции и се темелел на очекувања за континуиран раст на бројот на патници и приходите од продажба на билети на балтичкиот и европскиот пазар.
Новиот план, наместо агресивно проширување, предвидува значително помала флота и постепено враќање на растот во наредните години.
