Бомбашки закани погодија најмалку 21 лет низ Европа, се испитува можна руска поврзаност

Најмалку 21 лет и неколку аеродроми низ Европа вчера беа погодени од бомбашки закани, поради што авиони беа пренасочувани, а во одредени случаи беа ангажирани и воени борбени авиони. Сите дојави се покажале како лажни, но нивната истовременост отвори сомнежи за можна координирана операција и поврзаност со Русија, објави Би-Би-Си.

Во речиси сите случаи заканите биле оценети како доволно сериозни за да предизвикаат безбедносни мерки, со исклучок на аеродромот Хитроу во Лондон. Во Италија биле подигнати и борбени авиони за придружба на еден од загрозените патнички авиони. Иако не биле пронајдени експлозивни направи, властите не можат однапред да ги сметаат за лажни евентуалните идни закани.

— реклама —

Сомнежите за можна руска вмешаност се појавуваат по серија други сомнителни инциденти низ Европа. Во изминатите месеци биле забележани кибернапади и појавување беспилотни летала над чувствителни локации. Во последните денови биле нападнати системи за ладење во супермаркети и една банка за крв, а бил пријавен и сомнителен инцидент на полската граница со Русија.

Во август, беспилотно летало извршило напад врз германскиот аеродром Лајпциг/Хале, за што германскиот министер за внатрешни работи јавно ја обвини Москва.

— реклама —

Дел од аналитичарите сметаат дека заканите кон патничките авиони би можеле да бидат дел од хибридно војување – начин на дејствување преку саботажи, кибернапади, ширење дезинформации и нарушување на критичната инфраструктура, без отворен воен судир. Ваквите активности често се изведуваат така што одговорноста тешко може да се утврди, а инцидентите остануваат под прагот за активирање на членот 5 од НАТО за колективна одбрана.

— реклама —

Сепак, до четвртокот вечерта немало цврсти докази што би ги поврзале заканите со Русија, Иран или групи што дејствуваат во нивно име.

Една од можните траги за истражителите е електронската порака испратена во четвртокот наутро до управата на аеродромите во Рим. Испраќачите се претставиле како „Борци на Машката држава“, име што може да упатува на руската екстремнодесничарска група „Мужској легион“. Групата била забранета со одлука на московски суд во 2021 година, но и покрај тоа задржала десетици илјади следбеници на Телеграм. Нејзините припадници ја поздравиле руската инвазија врз Украина во 2022 година.

— реклама —

Но, самото користење на името не докажува дека групата стои зад заканите. Можно е некој друг да го искористил нејзиниот идентитет за да ја прикрие сопствената вмешаност или да ги насочи сомнежите кон погрешна страна.

Затоа, за европските полиции, аеродроми и министерства за транспорт, клучно е да се утврди потеклото на заканите и да се најдат конкретни докази за одговорните, а истовремено да се подготват мерки за намалување на последиците од евентуални нови инциденти.