Бран дојави за бомби во Европа: авиони пренасочувани, активирани безбедносните служби

Серија дојави за поставени бомби предизвика вонредни безбедносни проверки и промени во воздушниот сообраќај во повеќе европски земји. Неколку патнички авиони биле пренасочени или проверени, а безбедносните служби биле активирани на повеќе аеродроми, пренесуваат светските агенции.

— реклама —

Меѓу посериозните случаи е инцидентот со авион на ирската авиокомпанија „Ер Лингус“, кој летал од Даблин кон Рим. Поради закана со бомба, леталото било пренасочено кон воената воздухопловна база Евре, западно од Париз, каде што безбедно слетало. Во авионот имало 151 патник и шест членови на екипажот, кои биле евакуирани додека специјализирани екипи вршеле проверки.

— реклама —

Во Бугарија, три авиони што летале кон Софија биле опфатени со слични закани. Летовите од Копенхаген и Мадрид слетале во Софија, додека авионот од Лондон бил пренасочен кон Пловдив.

Безбедносни закани биле пријавени и на летови поврзани со Италија. Авион на „Финер“, кој летал од Хелсинки кон Рим, бил придружуван од италијански воени авиони и безбедно слетал на планираниот аеродром. Летот на „Виз ер“ од Милано кон Варшава, пак, бил пренасочен кон Виена.

— реклама —

Овие инциденти се надоврзуваат на серијата закани што го нарушуваат европскиот авиосообраќај во последните денови. Во вторникот најмалку седум авиони биле подложени на безбедносни проверки по дојави за експлозивни направи. Некои летови биле пренасочени, а во одредени случаи биле ангажирани и воени авиони.

— реклама —

По извршените проверки не биле пронајдени експлозивни направи.