Ајкула му ја откинала ногата, а додека се борел за живот му изгледало како да му намигнува - сурфер преживеал хорор во Австралија

Сурфер од Австралија, кој ја загубил десната нога во напад од ајкула, првпат јавно проговори за драматичните моменти во морето и откри необичен детаљ од борбата за живот. Додека животното го влечело под водата, тој се обидувал со прстите да му го повреди окото, но му изгледало како ајкулата да му намигнува.

Мел Исмаил, кој работи како професионален пожарникар, бил нападнат на 14 септември додека сурфал на плажата Гленфилд, во близина на Џералдтон, на западниот брег на Австралија. Во нападот ја загубил десната нога под коленото, пренесува „Асошиејтед прес“.

Во интервју за австралиската јавна телевизија Еј-Би-Си, Исмаил раскажал дека непосредно пред нападот одморал на даската за сурфање и набљудувал јато од дваесетина делфини.

„Прво помислив дека ме удри делфин. А потоа, одеднаш, нешто ме зграпчи и ме повлече под водата. Веднаш знаев дека е ајкула“, раскажал тој.

— реклама —

Додека се обидувал да се ослободи од животното, забележал нешто што не можел да го објасни.

„Му го видов окото, големо и црно. Но изгледаше како да ми намигнува. Се обидував да му ги вметнам прстите во окото и притискав најсилно што можев“, изјавил Исмаил.

Според научните објаснувања, некои видови ајкули, меѓу кои големата бела ајкула и мако-ајкулата, немаат очни капаци. За време на напад можат да ги повлечат очите наназад за да ги заштитат, при што станува видлив слој од бела 'рскавица. Ваквото движење може да изгледа како намигнување.

— реклама —

Надлежните служби сè уште не утврдиле кој вид ајкула го нападнал сурферот.

Откако животното го пуштило, тешко повредениот Исмаил успеал со помош на брановите да се приближи околу дваесетина метри кон брегот. Во тие моменти веќе губел сила и здив, но на плажата го забележал сурферот Шанан Дан, кој веднаш му пришол на помош.

Дан му помогнал да се качи на неговата даска и заедно се упатиле кон брегот.

„Прво ме праша каде е ајкулата. Му одговорив дека не знам, бидејќи во тој момент имав премногу свои проблеми“, се присетил Исмаил.

— реклама —

Кога стигнале на плажата, еден од присутните направил импровизирана преврска за запирање на крварењето, користејќи го јажето од даската за сурфање. Друг повикал итна медицинска помош, додека двајца тинејџери помогнале повредениот да биде пренесен до теренското возило на Дан.

Со возилото тргнале по плажата во пресрет на медицинската екипа.

„Во автомобилот имаше повеќе луѓе кои ме засмејуваа и ми го одржуваа расположението. Се поздравувавме со тупаници бидејќи се чувствував добро. Тогаш станав уверен дека ќе преживеам“, раскажал Исмаил.

И покрај тешката повреда и загубата на ногата, тој најавил дека планира повторно да се врати во морето, овојпат со даска за бодибординг.

Само четири дена по нападот врз Исмаил, голема бела ајкула усмртила 63-годишен пливач, Грег О'Нил, кај плажата Соренто во Перт, околу 400 километри јужно од Џералдтон.

Според податоците наведени во извештајот, Австралија годинава регистрирала пет смртоносни напади од ајкули. Во мај и јуни, во период од четири недели, загинале тројца подводни риболовци, додека во јануари дванаесетгодишно момче починало во болница неколку дена по напад од бик-ајкула во пристаништето во Сиднеј.

Австралиската база на податоци за инциденти со ајкули покажува дека од 2000 година во земјата во просек се регистрираат два до три смртоносни напади годишно.