Ајкулата што привлече 1,7 милиони посетители во Бусан исчезна по повеќемесечен престој

Ајкулата наречена „Букаг-и“, која со месеци престојуваше во крајбрежен канал во јужнокорејскиот град Бусан и привлече речиси 1,7 милиони посетители, не е забележана од 27 октомври. Ова укажува на можноста животното да се упатило кон отворено море, објави агенцијата Јонхап.

— реклама —

Според надлежните служби, ајкулата последен пат била забележана во близина на излезот од каналот што води кон Северното пристаниште.

— реклама —

Стручњаците сметаат дека нејзиното заминување можеби е поврзано со намалувањето на температурата на водата, која паднала на 18 до 19 Целзиусови степени.

— реклама —

Ајкулата првпат била забележана во каналот на 18 септември. Локалните власти трипати безуспешно се обиделе да ја насочат кон океанот. По последниот обид, таа се задржала во водите во близина на пристаништето, надвор од каналот, каде што биле поставени заштитни мрежи за да се спречи нејзиното враќање.

— реклама —

Властите планираат мрежите да останат поставени уште извесно време, а одлуката за нивно отстранување ќе ја донесат околу еден месец откако ќе биде потврдено дека ајкулата го напуштила тоа подрачје.