Ајкула долга околу 3,5 метри, која залутала во пристаништето во Бусан, еден од најголемите пристанишни градови во Јужна Кореја, за само две недели се претвори во вистинска атракција. Според проценките на градските власти, околу 600.000 луѓе дошле да ја видат.
Ајкулата првпат била забележана на 18 септември во тесен пловен канал во Северното пристаниште во Бусан. Оттогаш не успеала сама да најде пат назад кон отворено море, па властите вчера се обиделе да ја насочат кон океанот.
Крајбрежната стража и други служби распоредиле пловила зад ајкулата и со прскање вода се обиделе да ја придвижат кон морето. Сепак, обидот не успеал, бидејќи животното се оддалечило од млазовите вода.
Властите сега планираат нова акција, при која со рибарска мрежа ќе се обидат да ја извлечат ајкулата од каналот. Според „Чосун дејли“, акцијата треба да се спроведе задутре.
Во меѓувреме, ајкулата стана вистинска ѕвезда во Јужна Кореја и го доби прекарот „Буканги“. За време на четиридневниот празник Чусок минатиот викенд, околу 480.000 луѓе го посетиле крајбрежниот парк од каде што може да се види животното.
За споредба, истиот парк вообичаено го посетуваат околу 2.000 луѓе дневно за време на викендите, се наведува во соопштението на градот Бусан и во медиумските извештаи.
Популарноста на ајкулата отиде дотаму што градот Бусан вчера ја прогласи за почесен амбасадор за односи со јавноста.
Во Јужна Кореја и претходно приказни поврзани со животни привлекувале големо внимание кај јавноста.
