Австралија нареди отстрел на ајкула по смртоносниот напад, телото на капачот сè уште се бара

Мажот кој вчера наутро загина во напад на ајкула на плажата Соренто во Перт, Австралија, е идентификуван како 63-годишниот Грег О’Нил. Пливал во близина на брегот кога го нападнала голема бела ајкула. Неговото семејство го опиша како посветен татко и сопруг и голем љубител на океанот, пишува ABC News.

„Нашето семејство е длабоко потресено и скршено од страшната трагедија која го одзеде животот на таткото, иден дедо, брат, чичко, сопруг и пријател, Грег Џејмс О’Нил“, соопшти семејството. „Тој беше великодушен и посветен семеен човек кој на своите деца им пружи неизмерна љубов, внимание и можности. Грег го сакаше океанот и беше страстен пливач, љубител на спортот, посветен работник и духовит човек. Длабоко ги цениме сите изрази на сочувство и поддршката што ја добивме“, наведуваат тие.

Министерката за рибарство на Западна Австралија, Џеки Џарвис, издаде налог за фаќање и усмртување на ајкулата. Сепак, таа нагласи дека поширок отстрел по овој настан не го смета за соодветен. Плажите во северните предградија на Перт и денес се затворени додека трае потрагата по ајкулата и телото на загинатиот О’Нил.

— реклама —

Неговото семејство денес ја посети плажата, а граѓаните оставаат цвеќе за да му оддадат почит. Ова е трет смртоносен напад од ајкула во Западна Австралија годинава, а втор во само една недела, поради што повторно се поставува прашањето за безбедноста на капачите.

Министерката Џарвис објасни дека одлуката за издавање налог за усмртување ја донела откако полицијата успеала да ја идентификува ајкулата пред да отплива.

„Одлуката ја донесов земајќи ги предвид вонредните околности на нападот, опасноста што ја претставува таа ајкула и можноста за собирање докази за истрагата на мртовечката служба“, изјави Џарвис.

— реклама —

Таа додаде дека во петокот била поставена опрема со мамки, која вообичаено се користи за означување на животни, во обид да се фати неозначена голема бела ајкула. Сепак, поради лошото време и немирното море, опремата денес не можела да се користи.

Џарвис наведува дека ова е првпат по десет години во Западна Австралија да биде издаден налог за фаќање и усмртување на ајкула, но истакнува дека масовниот отстрел на големи бели ајкули во овие околности не е решение.

— реклама —

„Големите бели ајкули се меѓународно заштитен вид. Ова не значи дека ќе ги истребиме сите предатори во океанот. Не сакам на луѓето да им давам лажно чувство на сигурност бидејќи не можам апсолутно да го отстранам секој ризик“, порача таа.

Досегашната стратегија на Западна Австралија се потпираше на означување и следење на ајкулите, апликации за предупредување, сирени, заштитни мрежи и лични уреди за одбивање на ајкули. Министерката најави дека владата ќе ги преиспита постојните мерки.

„Ова е исклучително потресно. Ќе разговарам со колегите од итните служби и полицијата за да видиме што уште можеме да преземеме“, рече Џарвис.

Заштитната бариера на северниот дел од плажата Соренто беше отстранета во 2020 година поради дефекти и високите трошоци за одржување. Џарвис порача дека е подготвена повторно да разговара со локалните власти за нејзино поставување.

Една од опциите што сериозно се разгледува е воведување и на повеќе дронови за надзор на крајбрежјето. Владата веќе финансира дронови за спасувачките клубови, кои ги користат на натпревари и детски настани. Владата ќе ја разгледа и можноста за проширување на програмата за означување на ајкулите.

Во Западна Австралија моментално се означени повеќе од 300 единки, од кои 227 се големи бели ајкули. Според извештајот на агенцијата CSIRO од 2018 година, долж брегот на оваа сојузна држава се движат околу 1.500 големи бели ајкули, а нов извештај се очекува во мај.