„Ако ги изгубам изборите, ќе им се смеам в лице – и од притвор, и од затвор, па дури и од гроб“, вели Вучиќ

Српскиот претседател Александар Вучиќ изјави дека нема намера да ја напушти Србија доколку Српската напредна партија (СНС) ги загуби претстојните избори, додавајќи дека ќе им честита на политичките противници доколку освојат мнозинство од гласовите.

— реклама —

Во интервју за телевизијата „Прва“, Вучиќ рече дека, доколку парламентарните избори се одржат во октомври, претседателските најверојатно ќе бидат организирани кон крајот на декември или на почетокот на јануари 2027 година. Ако парламентарните избори се одржат во ноември, претседателските би следувале во јануари или најдоцна на почетокот на февруари.

Предвремени избори веќе подолг период бараат студентското движење и дел од јавноста, кои организираат протести по трагедијата на железничката станица во Нови Сад во 2024 година, кога при уривање на настрешница загинаа 16 лица.

— реклама —

Вучиќ изјави дека изборната листа на СНС ќе содржи повеќе млади кандидати отколку листата што ја најавува студентското движење и порача дека со гордост ќе биде дел од неа, без разлика на кое место ќе се најде.

— реклама —

„Можно е да ги изгубиме изборите. Ако победат, ќе им честитам уште истата вечер, но ќе кажам и дека на власт дошле најлошите можни луѓе. Ќе им се смеам в лице – и од притвор, и од затвор, па дури и од гроб“, изјави Вучиќ.

Тој исто така ги обвини Европа и Соединетите Американски Држави дека им даваат поддршка на неговите политички противници, а призна дека во власта има луѓе кои се корумпирани, арогантни или не ја извршуваат доволно добро својата работа.

— реклама —

Осврнувајќи се на порталот „Кој си бе ти?“, кој беше отворен за пријавување корупција и злоупотреби, Вучиќ рече дека досега пристигнале околу 10.000 пријави, а институциите одговориле на приближно 3.500 од нив.