Јасна Марковска, мајка на загинатиот Матеј во пожарот во дискотеката „Пулс“ во Кочани, најави протести доколку Основниот кривичен суд Скопје денес не го прифати предлогот на Обвинителството за определување притвор на Дејан Јованов-Деко.
„Доколку Кривичен го одбие предлогот за притвор на ‘човекот’ кој во една ноќ однесе во гроб повеќе деца отколку во било која војна во историјата на оваа земја, излегуваме на протести!“, порача Марковска.
Обвинителството за гонење организиран криминал и корупција отвори нова истрага против Јованов за кривично дело „Давање поткуп“ и побара да му биде определен притвор. Според Обвинителството, Јованов е осомничен дека дал поткуп на службено лице во Министерството за економија за да му обезбеди лиценца за вршење угостителска дејност, без да поднесе барање за лиценца и иако знаел дека објектот не ги исполнува законските услови.
Основниот кривичен суд Скопје потврди дека предлогот бил доставен доцна попладнево и најави дека по него ќе постапува во текот на утрешниот ден.
Јованов веќе е во притвор во постапката за пожарот во „Пулс“, во кој загинаа 63 лица, а повеќе од 200 беа повредени. Актуелниот притвор во тој предмет истекува на 3 октомври.
Обвинителството во новиот предмет го образложи барањето за притвор со опасност од бегство и со фактот дека против Јованов се води и кривичната постапка за „Тешки дела против општата сигурност“. За новото барање за притвор треба да одлучува судија на претходна постапка.
