Ако има конкретен материјал и факти, ќе се отвори истрага за Алта банка, тврди Хаџи-Василева

Новата раководителка на Основното јавно обвинителство за гонење организиран криминал и корупција, Искра Хаџи-Василева, изјави дека Обвинителството ги следи случувањата поврзани со Алта банка, организацијата на прославите за Денот на независноста и други прашања од јавен интерес, но нагласи дека за формирање обвинителски став се потребни конкретни факти и докази.

— реклама —

Одговарајќи на новинарско прашање дали Обвинителството има став за овие случаи и дали треба да ги испита изнесените наводи, Хаџи-Василева посочи дека не би било соодветно да се изнесуваат заклучоци без конкретни материјали.

„За да имате обвинителски став, мора да располагате со конкретен материјал и факти, без оглед на тоа што се зборува во јавноста, што кружи во медиумскиот простор или што произлегува од новинарски написи“, изјави таа.

— реклама —

Таа додаде дека посериозните индиции или основи за сомневање би претставувале поинаква ситуација, а евентуалните активности на Обвинителството ќе зависат од сознанијата и доказите со кои ќе располага.

— реклама —

Во врска со можноста за соработка со српското Обвинителство за организиран криминал, поради истрагата во Србија и информациите за сопственикот на Алта банка, Хаџи-Василева рече дека меѓународната соработка е редовен дел од работата на обвинителството и законска обврска.

„Доколку се отвори какво било прашање во рамките на кривичен прогон или испитување на одредена состојба, секако дека соработуваме со колегите од други држави“, нагласи таа.

— реклама —

Осврнувајќи се на најавените законски измени, особено на новиот Кривичен законик, Хаџи-Василева посочи дека законските решенија се подготвуваат со години и од нив се очекува да придонесат за поефикасно функционирање на правосудството.