СДСМ преку соопштение тврди дека Антикорупцискиот тим на партијата продолжува да открива нови детали за, како што ја нарекува, тендерската мрежа вредна над 100 милиони евра, во која, според нив, едни исти компании добиваат милионски договори од институции и општини под раководство на ВМРО-ДПМНЕ.
Од партијата посочуваат дека, покрај претходно објавените информации за фирмите „Ленди Груп“, „Пирамид Билдинг Солушнс“ и „Мастеф“, кои добиле десетици тендери во изминатите две години, истата шема продолжува и преку компании кои вршат надзор и проектирање.
Според СДСМ, речиси на сите проекти каде овие фирми се јавуваат како изведувачи, надзорот и проектирањето ги вршат само две компании – „МГ Проект“ и „МБМ Архитекти“.
„Во десетици општини и институции се повторува истиот образец. Истите фирми добиваат тендери, а истите компании вршат надзор и проектирање“, наведуваат од партијата.
СДСМ тврди дека во периодот на владеење на ВМРО-ДПМНЕ, двете компании бележат значителен раст. Според нивните податоци, „МГ Проект“ склучила договори во вредност од 2,4 милиони евра, додека „МБМ Архитекти“ договори во вредност од 2,9 милиони евра, што претставува раст од речиси 289 проценти.
Од партијата прашуваат дали Јавното обвинителство ќе отвори постапка и ќе ги испита наводите или, како што велат, ќе продолжи да молчи.
СДСМ најавува дека и понатаму ќе ги објавува, како што ги нарекува, тендерските шеми и ги повика граѓаните да пријавуваат сомнежи за корупција преку нивната дигитална платформа.
„Да ја вратиме власта во рацете на граѓаните. Сите ќе одговараат, од прв до последен“, порачаа од СДСМ.
