Во текот на ноќта меѓу 13 и 14 септември, до 7:30 часот утрово, во земјава биле регистрирани 11 пожари на отворен простор. Според Центарот за управување со кризи, еден пожар е активен, додека останатите 10 се изгаснати.
Активниот пожар е на територијата на Општина Македонски Брод, во атарот на селото Белица, на местото викано Кајорец, каде што гори нискостеблеста и мешана шума.
Во истиот период нема регистрирани пожари кои се ставени под контрола.
Изгаснати биле пожари во селото Радуша, Општина Сарај, каде што горела ниска вегетација, како и во селото Конско во Општина Гевгелија.
Во Општина Струга биле изгаснати два пожара – во Татеши, каде што гореле стрниште и ниска вегетација, и во Велешта, каде што горела ниска вегетација.
Пожар бил изгаснат и во селото Ораовец, Општина Велес, каде што гореле ниска вегетација и дрвца бадеми.
Во селото Требош, Општина Желино, горела ниска вегетација, додека во Општина Кичево биле регистрирани два изгаснати пожара, во Туин и Зајас, каде што гореле ниска вегетација и стрништа.
Во Општина Могила пожарот бил регистриран на потегот од Долно Српци до Беранци, каде што горела ниска вегетација. Последниот од десетте изгаснати пожари бил во селото Болно, Општина Ресен, каде што горело ѓубре.
Од ЦУК информираат дека податоците се однесуваат на состојбата заклучно со 7:30 часот.
