Активистите од „Зелена народна стража“ обвинуваат дека Владата донела одлука за продолжување на рокот за изградба на контроверзните мали хидроцентрали на реката Дошница на планината Кожуф, оценувајќи дека со тоа повторно се отвора можност за реализација на проект на кој локалното население и еколошките здруженија силно му се спротивставуваат.
Според нив, одлуката била донесена зад затворени врати, иако претходно, како што велат, граѓаните со повеќедневни блокади јасно покажале дека не прифаќаат изградба на мали хидроцентрали на една од најчистите реки во земјава.
„Додека многу држави ги отстрануваат малите хидроцентрали поради штетните последици врз природата, кај нас повторно се прават обиди да се уништи реката Дошница. По 70 дена блокади и јасен став дека никој тука не сака мали хидроцентрали, некој повторно се обидува да ја погази волјата на народот“, наведуваат активистите.
Тие повторно го отвораат и прашањето зошто Кожуф сè уште нема статус на национален парк, оценувајќи дека природното богатство не смее да биде жртвувано за, како што велат, интересите на поединци.
Од „Зелена народна стража“ најавуваат дека доколку продолжат активностите за изградба на хидроцентралите, повторно ќе организираат блокади и протести, со порака дека нема да дозволат изградба на мали хидроцентрали на Дошница.
Реакцијата следува само неколку дена по почетокот на демонтирањето на две недовршени мали хидроцентрали на реката Пена на Шар Планина, каде проектите беа стопирани поради нивната локација во заштитеното подрачје на Националниот парк „Шар Планина“.
