ДОШНИЦА

Активисти најавија нови блокади за Дошница: „Ќе стоиме пред багерите, Дошница е наша“

Активистите од иницијативата „Changemakers4all“ објавија дека повторно започнуваат блокади против изградбата на минихидроелектрана на реката Дошница на Кожуф, тврдејќи дека дозволата за градба е продолжена и дека се подготвува внесување механизација на терен.„Јавно соопштуваме дека знаеме оти е продолжена дозволата за градба на минихидроелектраната на Дошница. Знаеме и дека се подготвува внесување на механизација со обезбедување, со цел да се оттурне народот и да се оттурне вистината“, наведуваат активистите.Тие порачуваат дека нема да дозволат, како што велат, уништување на една од последните чисти реки во земјава.„Но нека биде јасно — Дошница е наша! Нема сила што ќе нè натера да молчиме додека се уништува една од последните чисти реки и природни богатства“, стои во објавата.Од иницијативата потсетуваат дека градоначалниците на Кавадарци, Гевгелија и Демир Капија претходно потпишале барање за издвојување средства за изработка на студии поврзани со случајот.„Ги потсетуваме градоначалниците на општините Кавадарци, Гевгелија и Демир Капија дека го потпишаа барањето поднесено од нас, активистите, за издвојување средства од ребалансите на општинските буџети за изработка на побараните студии, документ кој беше потпишан и од 13 академици“, наведуваат тие.Активистите бараат локалните власти да го исполнат потпишаното.„Ги повикуваме да го исполнат потпишаното“, додаваат тие.Во објавата се наведува дека од денес повторно започнале блокади на терен.„Ќе стоиме пред багерите, пред механизацијата и пред секој обид за ставање на Дошница во цевка“, порачаа активистите.Тие бараат и поголема транспарентност од Владата во однос на сите документи и постапки поврзани со проектот.„Секој документ поврзан со овој договор треба да биде јавен. Секој состанок со инвеститори треба да биде документиран и објавен. Секое правно мислење треба да биде објавено“, се наведува во соопштението.Активистите порачуваат дека Кожуф и Дошница се природно богатство што мора да биде заштитено.„Запомнете дека ова е наша земја. Не на политичарите, не на инвеститорите. Наша река, наша планина, наша Македонија“, стои во објавата.

Македонија | пред 2 седмици

Фирмата што изнајмувала машини за хидроелектраната на Дошница се повлекла – активистите слават, но најавуваат нова битка

Приватната компанија која изнајмувала градежна механизација за изградбата на хидроелектраната на реката Дошница на Кожуф се повлекла од проектот, информираа денеска активистите од иницијативата „Спас на Дошница“.„Ова е доказ дека народниот отпор е посилен од секој профит. Им благодариме за свесноста и одлуката да не се стават на страната на уништувачите“, порачуваат од групата.Сепак, активистите предупредуваат дека ова не значи крај на борбата.„Властите – ако имате грам чест и достоинство, веднаш поништете ја оваа срамна дозвола! Државата не е ваша приватна играчка, реките не се ваша стока, а народот не е ваше робје. Ние не се тргнуваме, ниту отстапуваме. Ќе стоиме до крај – со глас, со тело и со срце! Ова е нашата земја, ова е нашата вода, ова е нашата победа што доаѓа!“, стои во објавата.Изградбата на хидроелектраната на Дошница веќе подолго време е предмет на остри реакции од еколошки организации и локалното население, кои предупредуваат дека проектот ќе има трајни штети врз реката и биодиверзитетот во регионот.

Македонија | пред 9 месеци