Левица соопшти дека добила неофицијални информации според кои Владата повторно ги продолжила роковите за концесиите за изградба на мини-хидроцентрали на реката Дошница и побара институциите веднаш да ја објават целата документација поврзана со проектот.
Од партијата велат дека, доколку овие информации се покажат како точни, тоа би значело дека повторно се отвора можност за реализација на проект на кој граѓаните и еколошките организации со години се спротивставуваат.
Во таа насока, советниците на Левица во Советот на Општина Кавадарци доставиле советничко прашање со кое бараат целосен увид во документацијата за планираните мини-хидроцентрали „Папрад“ и „Баров Дол“ на реката Дошница.
Тие бараат од Општината да ги достави сите релевантни документи, меѓу кои барањата за одобрение за градење, основните проекти и нивната ревизија, договорите за концесија, геодетските елаборати, доказите за платени надоместоци и административни такси, како и издадените одобренија за градење.
Од Левица наведуваат дека противењето на изградбата на мали хидроцентрали е нивна програмска определба и оценуваат дека ваквите проекти не се во интерес на граѓаните, туку на концесионерите.
Партијата потсетува дека во повеќе наврати иницирала Кожуф да биде прогласен за национален парк, како и дека во Собранието предложила обезбедување средства за изработка на студија за валоризација, но предлогот не бил прифатен.
„Борбата за Дошница веќе еднаш покажа дека сплотениот народ може да ги запре штетните екстрактивни проекти. Но, сè додека концесиите формално постојат, постои и опасност тие повторно да бидат активирани“, велат од Левица.
Од партијата најавуваат дека по добивањето на одговорите од институциите, целокупната документација и сите релевантни информации ќе бидат јавно објавени, а јавноста ќе биде навремено информирана за понатамошниот развој на случајот.
