Левица: Има пари за службени возила, нема за мајките земјоделки - демографски загриженото ДПМНЕ против Предлог-законот за платено породилно отсуство за 38.000 жени земјоделки

Левица преку соопштение обвинува дека власта ги оставила без породилна заштита 38.000 жени земјоделки, откако пратениците не го поддржале нејзиниот предлог-закон за изменување и дополнување на Законот за здравственото осигурување. На гласањето, од 87 регистрирани пратеници, само 23 гласале „за“.

Со предложените измени требало да се воведе право на платено породилно отсуство за жените индивидуални земјоделки, како и паричен надоместок при привремена спреченост за работа поради болест или повреда.

— реклама —

Пратеничката Јована Мојсоска во своето обраќање истакнала дека станува збор за основно работничко и социјално право, а не за привилегија. Таа оценила дека е недозволиво жените кои произведуваат храна, плаќаат придонеси и се грижат за своите семејства да немаат законска заштита за време на мајчинството.

— реклама —

Од Левица потсетуваат дека Комисијата за спречување и заштита од дискриминација во 2023 година утврдила индиректна, продолжена и интерсекциска дискриминација врз жените земјоделки. Дополнително, во 2026 година, Основниот граѓански суд во Скопје донел пресуда со која ја утврдил одговорноста на Владата и Министерството за здравство за нивното нееднакво третирање при остварувањето на правата од здравственото осигурување.

Мојсоска посочила дека ниту претходната влада предводена од СДСМ и ДУИ, ниту актуелната влада предводена од ВМРО-ДПМНЕ, ВЛЕН и ЗНАМ не презеле законски измени за надминување на оваа состојба.

— реклама —

Предлог-законот предвидувал трајно вклучување на индивидуалните земјоделки во системот на парични надоместоци од задолжителното здравствено осигурување, наместо остварувањето на овие права да зависи од привремени владини програми и административни постапки.

— реклама —

Од Левица ја обвинуваат власта за недоследност, посочувајќи дека декларативно се залага за поддршка на семејството, мајчинството и демографското обновување, но не поддржува законско решение за жените кои придонесуваат за земјоделското производство и опстанокот на руралните средини.

„Државата не смее да прави разлика меѓу мајките врз основа на тоа каде и како ја заработуваат својата егзистенција“, порачуваат од партијата.