Левица: ДПМНЕ мести свои луѓе да го надгледуваат прислушувањето - го преземаат и граѓанскиот надзор

Левица преку соопштение обвинува дека владејачката ВМРО-ДПМНЕ се обидува да воспостави партиско влијание врз Советот за граѓански надзор, телото задолжено да ја контролира законитоста на мерките за следење на комуникациите.

— реклама —

Од партијата реагираат дека наместо независни и стручни членови, за составот на Советот се предлагаат лица за кои постојат партиски и семејни поврзаности со владејачката партија.

Како што наведуваат од Левица, на предлог на пратеникот Миле Лефков, собраниската Комисија за прашања на изборите и именувањата ги предложила Андон Дамовски, социјален работник, и Гордана Стефковска-Вељановска, психолог, за членови на Советот. Од Левица посочуваат дека Стефковска-Вељановска е сопруга на Роберт Вељановски, директор на Драмскиот театар и поранешен член на Извршниот комитет на ВМРО-ДПМНЕ.

— реклама —

Партијата смета дека е спорно што поддршка од Комисијата не добиле петмина други кандидати со образование од правните и безбедносните науки.

— реклама —

Од Левица потсетуваат и на наводите во извештајот на Европската комисија, според кои Советот за граѓански надзор не функционира од неговото законско воспоставување во 2018 година. Дополнително, како што наведуваат, во текот на 2025 година собраниската Комисија за надзор над следењето на комуникациите не спровела ниту еден надзор над овластените органи, операторите и Оперативно-техничката агенција.

Според Левица, ваквите состојби се особено загрижувачки во период кога Владата најавува промени во безбедносно-разузнавачкиот сектор, а Европската комисија укажува на недостатоци во независноста и функционирањето на надзорните механизми.

— реклама —

Од партијата оценуваат дека Македонија веќе имала сериозни последици од партиското влијание врз безбедносните служби и предупредуваат дека секој обид за политичка контрола врз институциите задолжени за надзор над прислушувањето претставува ризик за демократскиот поредок.