Левица: ДПМНЕ го отфрли и не сакаше ниту да дискутира за помали станбени кредити за младите семејства - за наталитетот ќе продолжат да се грижат со „бато и дада“ во читанките

Левица преку соопштение ја обвини ВМРО-ДПМНЕ дека го отфрлила нејзиниот предлог за финансиска поддршка на младите семејства при купување стан, без да отвори расправа за предложеното законско решение.

— реклама —

Станува збор за Предлог-законот за семејна и станбена поддршка, со кој се предвидува државата да преземе 20 проценти од главнината на станбениот кредит за секое родено или посвоено дете, со вкупна поддршка до 100.000 евра.

— реклама —

Од Левица велат дека додека младите се соочуваат со високи кирии, долгорочни кредити и економска неизвесност, владејачкото мнозинство не покажало политичка волја ниту да разговара за предложените мерки. Партијата ја обвинува власта за противречност меѓу декларативната грижа за семејните вредности и одбивањето да поддржи конкретни мерки за подобрување на условите за живот.

Како аргумент за сериозноста на демографските состојби, Левица наведува дека во првите шест месеци од 2026 година, 65 од вкупно 80 општини имале негативен природен прираст, а на државно ниво биле регистрирани 2.967 повеќе починати отколку новородени. Според партијата, младите во Македонија во просек се осамостојуваат на 33 години, наспроти 27 години во Хрватска, додека месечните кирии во скопските општини надминуваат 22.000 денари.

— реклама —

Од Левица сметаат дека демографската криза не може да се надмине со морални пораки и промени во училишните читанки, туку се потребни материјална сигурност, достапно домување и подобри услови за живот.

— реклама —

Партијата нагласува дека предложениот закон бил поднесен во редовна постапка, со можност за расправа, измени и усогласување на моделот, но дека парламентарното мнозинство не ја искористило таа можност. Според Левица, младите не бараат политички пораки за создавање семејство, туку конкретна поддршка за да можат да обезбедат дом и економска стабилност.