„Пет години Клиничката болница во Битола не прави спермограми - пациентите се принудени да плаќаат по 150 евра за анализа“, велат од Левица

Пациентите од Битола и околните општини повеќе од пет години не можат да направат спермограм во Клиничката болница „Д-р Трифун Пановски“, поради што се принудени да патуваат во други градови или да ги користат услугите на приватни лаборатории, соопшти Левица.

— реклама —

Според информациите што граѓаните ги доставиле до партијата, анализата може да се направи во државни здравствени установи во Охрид и Прилеп, додека во приватните лаборатории чини околу 150 евра.

— реклама —

Од Левица посочуваат дека недостапноста на оваа здравствена услуга претставува дополнителен товар за паровите кои се соочуваат со проблеми со плодноста, особено за оние кои се подготвуваат за инвитро-оплодување, бидејќи анализата може да треба да се повторува повеќепати.

— реклама —

Партијата ја поврзува оваа состојба со падот на наталитетот во Македонија и со апелите на Владата за поттикнување на повеќедетни семејства, оценувајќи дека граѓаните истовремено се соочуваат со недостапни здравствени услуги и дополнителни трошоци.

— реклама —

Левица бара од Министерството за здравство и раководството на Клиничката болница во Битола да ги утврдат причините поради кои анализата не се изработува повеќе од пет години и да обезбедат опрема, стручен кадар и услови за повторно воведување на услугата.