Во последното деноноќие во земјава се регистрирани 31 пожар на отворен простор, од кои четири и натаму се активни, три се ставени под контрола, а 24 се целосно изгаснати, информира Центарот за управување со кризи.
Активни се пожарите на подрачјата на Студеничани и Зелениково, каде што огнот зафаќа мешана шума, како и пожарот кај село Трново во општина Гостивар, кој се шири кон селата Битово, Заград и Страјане во општина Македонски Брод. Таму гори нискостеблеста шума, ниска вегетација, пасишта и папрат.
Пожар е активен и над селото Нежилово во општина Чашка, на месноста Сватови, каде што гори ниска вегетација и смреки. Активен пожар има и во селото Франгово, општина Струга, каде што се зафатени нискостеблеста шума и ниска вегетација.
Под контрола се пожарите кај селото Тајмиште во Кичево, на депонијата во Делчево и кај селото Стрмница во општина Брвеница.
Меѓу 24-те изгаснати пожари се и оние кај селата Желино, Стримница, Одри, Непроштен, Зајас, Форино, Виничани и Дихово, како и пожарите во близина на резерватот „Јасен“, Гази Баба, Беровско Езеро и на повеќе други локации.
Пожари биле регистрирани и на лозови и овошни насади во Росоман, меѓу Моноспитово и Муртино, како и на повеќе депонии, меѓу кои градските депонии во Кавадарци и Струмица.
