Активни шест пожари, гори и мешана шума кај Палиград и Вражале

Во повеќе делови од земјава денеска се активни пожари на отворен простор. Центарот за управување со кризи информира дека до 13 часот се регистрирани вкупно 11 пожари, од кои шест сè уште се активни, еден е ставен под контрола, а четири се целосно изгаснати.

— реклама —

Најголемиот број активни пожари се регистрирани во поширокиот скопски регион. На подрачјето на општините Студеничани и Зелениково гори мешана шума на потегот од Моране, преку Вртекица и Рамни Габер, со крак кон Палиград, како и над Вражале.

Пожар има и во гостиварското село Трново, каде што гори мешана шума, додека во општина Чашка, над Нежилово, гори смрека.

— реклама —

Во Пробиштип, кај селото Дренак, зафатена е ниска вегетација, а во општина Градско, кај Долно Чичево, пожарот зафатил стрниште и ниска вегетација. Активен пожар е регистриран и во кичевското село Зајас, каде што гори стрниште.

— реклама —

Под контрола е ставен пожарот во кичевското село Тајмиште, во местото Дарда, каде што гори високостеблеста букова шума.

Во текот на денот целосно се изгаснати четири пожари. Во сарајското село Чајлане и гостиварското Турчане горело ѓубре, во кумановското село Пчиња било зафатено стрниште, а во беровското село Митрашинци горела ниска вегетација.

— реклама —

Од ЦУК продолжуваат да ја следат состојбата на терен и да ги координираат активностите за справување со пожарите.