„Алкалоид“ со продажби од 263 милиони евра и инвестиции од 17,3 милиони евра

Фармацевтската компанија „Алкалоид“ АД Скопје продолжува со позитивните деловни резултати, остварувајќи консолидирани продажби од 263 милиони евра во периодот од јануари до септември 2026 година. Во истиот период, компанијата вложила 17,3 милиони евра во основни средства и отворила 60 нови работни места во Македонија.

Податоците од финансискиот извештај покажуваат дека единечните продажби достигнале 10,36 милијарди денари, што е зголемување за 2 проценти во споредба со истиот период во 2025 година. Консолидираните продажби, пак, изнесувале 16,2 милијарди денари, бележејќи раст од 7 проценти.

— реклама —

Значителен напредок е забележан и на домашниот пазар, каде што продажбите се зголемиле за 13 проценти. Од вкупните консолидирани продажби, 37 проценти се реализирани во Македонија, додека 63 проценти се остварени на странските пазари. Според регионалната распределба, земјите од Југоисточна Европа учествуваат со 28 проценти, Источна Европа со 18 проценти, а Западна Европа со 17 проценти.

Меѓу извозните пазари, најизразен раст е забележан во Казахстан, каде што продажбите се зголемиле 3,3 пати, како и во Швајцарија, со раст од 2,6 пати во однос на истиот период минатата година.

— реклама —

Фармацевтските производи имаат најголем удел во структурата на консолидираните продажби, со 92 проценти, додека преостанатите 8 проценти отпаѓаат на сегментите хемија, козметика и билкарство.

Инвестициите во основни средства достигнале 1,07 милијарди денари, што е за 34 проценти повеќе отколку во првите девет месеци од 2025 година.

— реклама —

Раст бележат и финансиските показатели. Единечната добивка пред финансиските трошоци, даноците и амортизацијата (ЕБИТДА) изнесувала 2,72 милијарди денари, што претставува зголемување од околу 7 проценти, додека единечната нето-добивка достигнала 1,64 милијарди денари, исто така со раст од 7 проценти.

На консолидирано ниво, ЕБИТДА изнесувала 2,99 милијарди денари, со раст од 8 проценти, а нето-добивката достигнала 1,54 милијарди денари, што е зголемување од 4 проценти.

Во текот на анализираниот период, „Алкалоид“ реализирал 60 нови вработувања во Македонија. Акциите на компанијата котираат на официјалниот пазар на Македонската берза од 2002 година, а нивната просечна цена во периодот јануари–септември изнесувала 24.398,08 денари.

За 2026 година, компанијата планира да вложи околу 8 проценти од консолидираните приходи од продажби во материјални и нематеријални средства. Бизнис-планот предвидува и раст од 7 проценти на консолидираните продажби и на консолидираниот профит во споредба со резултатите остварени во 2025 година.