(Видео) Мукаетов: Не се многу компаниите што успеале да издржат 90 години – зад успесите на „Алкалоид“ стојат вработените

„Не се многу компаниите што успеале да издржат 90 години“ – со оваа порака генералниот директор и претседател на Управниот одбор на „Алкалоид“, Живко Мукаетов, го означи почетокот на одбележувањето на големиот јубилеј на компанијата.

„Алкалоид“ одбележува девет децении постоење, а Мукаетов нагласи дека зад сите производи, дејности и успеси на компанијата стојат луѓето – од оние кои ги поставиле темелите, преку генерациите кои ја граделе, до вработените кои денес го продолжуваат нејзиниот развој.

— реклама —

„За нас е голем ден, затоа што почнуваме со одбележување на големиот за нас јубилеј, а тоа се 90 години од постоењето на ‘Алкалоид’. Мене ми е многу драго што овој јубилеј го започнуваме со нашите колешки и колеги, со членовите на нивните семејства, со нашите пријатели“, рече Мукаетов.

Тој потенцираше дека достигнувањата на компанијата не можат да се одвојат од генерациите вработени кои биле дел од нејзиниот развој.

— реклама —

„Сите производи, сите дејности, сите успеси на ‘Алкалоид’ се должат на луѓето. Тоа се луѓето кои ги поставиле темелите на ‘Алкалоид’, тоа се луѓето кои генерациски работеле за ‘Алкалоид’ да дојде на нивото на кое е денес, а сега е и генерацијата која денес е дел од ‘Алкалоид’ и која заедно со мене го гради ‘Алкалоид’ да оди напред и да биде уште поуспешен“, порача Мукаетов.

— реклама —

По девет децении постоење, тој упати благодарност до сите кои низ годините биле дел од компанијата.

„Една благодарност до сите генерации кои овие 90 години биле дел од ‘Алкалоид’, затоа што сепак треба да бидеме реални: не се многу компании кои успеале 90 години да издржат“, рече Мукаетов.

Одбележувањето на јубилејот започна во рамките на традиционалниот Хуманитарен пикник на компанијата, со што 90-годишнината беше поврзана со вредностите на хуманост, солидарност и заедништво.

Годинава визуелен симбол на јубилејот е и мотивот „Алкалоидовата куќа“, создаден од македонскиот артист Сатја Грабул, кој ја пренесува идејата за припадност и поврзаност на генерациите што ја создавале и ја создаваат компанијата.