„Алта банка“ почна со исплата на готовина во Битола, клиентите без картички можат да подигнат до 20.000 денари

Клиентите на „Алта банка“ АД Битола кои имаат платежни сметки, но не поседуваат платежни картички, од денеска, 5 ноември, можат да подигнуваат готовина на шалтерите во главната филијала во Битола.

— реклама —

Граѓаните ќе можат да подигнат најмногу 20.000 денари, што е дозволениот износ за период од две недели. Исплатата се врши на повеќе шалтери во филијалата на улицата „Добривое Радосављевиќ“ бр. 21, а мерката особено ги опфаќа пензионерите и примателите на социјална помош кои немаат платежни картички.

— реклама —

Клиентите треба да добијат СМС-порака со датумот и точниот час за исплата. Од банката апелираат да се почитуваат закажаните термини за да се избегнат гужви. За оние кои нема да можат да дојдат во предвидениот период ќе бидат организирани дополнителни термини.

Шалтерите ќе бидат наменети исклучиво за исплата на готовина, без можност за други банкарски трансакции. Од 6 ноември, вклучително и во сабота, 7 ноември, филијалата ќе работи во две смени. Во тек се подготовки за организирање исплати и во други градови.

— реклама —

Паралелно, продолжува постапката за промена на сопственичката структура на банката. Гувернерот Трајко Славески претходно соопшти дека до надлежниот регулатор во Србија е испратено известување со барање во рок од три дена да се изјасни дали „Алта банка“ АД Белград ќе ги понуди на продажба акциите што ги поседува во битолската банка.

— реклама —

Доколку белградската банка не ги понуди акциите, продажбата ќе ја спроведе Народната банка преку Македонската берза, согласно законските процедури. Славески најави дека понудата на акциите на Берзата ќе следува по истекот на десет дена и дека веќе постои интерес од потенцијални инвеститори од земјата и од странство.