Американските сили онеспособија танкер кој пловел кон Иран

Американските сили онеспособиле нафтен танкер во Оманскиот Залив откако бродот наводно ја прекршил поморската блокада кон Иран и се обидел да вплови во иранско пристаниште, соопшти Централната команда на американската војска (ЦЕНТКОМ).

— реклама —

Според американската страна, танкерот „Маривекс“, кој плови под знамето на Палау, се наоѓал во меѓународни води и се движел кон Иран кога бил пресретнат од американските сили.

— реклама —

Од ЦЕНТКОМ наведуваат дека екипажот не постапил според издадените наредби, по што борбен авион Ф/А-18 „Супер Хорнет“ од носачот на авиони USS Abraham Lincoln употребил прецизна муниција врз машинскиот простор и системот за управување на бродот.

Американската војска тврди дека по нападот танкерот повеќе не продолжил кон Иран.

— реклама —

Поморската блокада на сообраќајот кон иранските пристаништа САД ја спроведуваат од 13 април. Според податоците на ЦЕНТКОМ, од почетокот на операцијата биле онеспособени седум комерцијални бродови, а уште 134 биле пренасочени.

— реклама —

Од американската команда посочуваат дека овие активности се спроведуваат и покрај актуелното примирје меѓу САД и Иран.