Наглиот раст на цените на нафтата и природниот гас, предизвикан од ескалацијата на конфликтот на Блискиот Исток, нема да биде привремен, туку може да прерасне во подолгорочен тренд, предупредуваат економските аналитичари.
Цената на „брент“ нафтата утринава надмина 115 долари за барел, што е највисоко ниво во последната недела, додека цените на гасот пораснаа за околу 30 проценти. Причина за ова се нападите врз енергетската инфраструктура и сериозните нарушувања во снабдувањето.
Клучен проблем претставува и отежнатиот сообраќај низ Ормутскиот теснец, преку кој се транспортира значителен дел од светските енергенси.
Џејмс Мидвеј, заменик-директор на британскиот тинк-тенк „Вердант“, оценува дека станува збор за многу посериозен шок од очекуваното.
„Ова не е краткорочен скок. Пред неколку недели постоеше надеж дека пазарите ќе се стабилизираат, но сега ситуацијата е суштински променета“, вели Мидвеј.
Тој посочува дека, покрај проблемите со транспортот, сега се јавуваат и директни удари врз производството на нафта и гас, особено гасот, што дополнително ја намалува глобалната понуда.
Според него, ваквиот развој укажува дека ценовниот раст ќе има подолгорочни последици и ќе продолжи да врши притисок врз економиите ширум светот.
