Аналитичари предупредуваат: Вештачката интелигенција не ги дава очекуваните резултати

Технолошките компании и голем број корпорации во последните години масовно вложуваат во вештачка интелигенција, но новите истражувања покажуваат дека очекуваните резултати засега главно изостануваат.

Според анализите, од 2022 година досега во развој на вештачка интелигенција, дата-центри и инфраструктура биле вложени повеќе од илјада милијарди долари, додека паралелно се спроведувале масовни отпуштања.

— реклама —

Истражување на компанијата „Гартнер“, спроведено меѓу 350 директори на големи глобални компании, покажало дека дури 80 проценти од нив го намалиле бројот на вработени за да инвестираат во автоматизација и вештачка интелигенција.

Сепак, голем дел од компаниите признале дека не се сигурни дали овие инвестиции навистина носат поголема продуктивност и намалување на трошоците.

— реклама —

Истражувањето покажува и дека компаниите што отпуштале работници заради вложувања во вештачка интелигенција не оствариле подобри финансиски резултати од оние што тоа не го направиле.

Најдобри резултати, според анализата, имаат фирмите што ја користат вештачката интелигенција како алатка за помош на вработените, а не како нивна замена.

— реклама —

Во меѓувреме, американските компании во 2025 година најавиле повеќе од 1,09 милиони откази, што е за 65 проценти повеќе во споредба со претходната година.

Најголем број отпуштања има во технолошкиот сектор, но значителен раст е забележан и во логистиката, складирањето, малопродажбата, медиумите и услужните дејности.

— реклама —

Дополнително, истражување на МИТ покажало дека дури 95 проценти од проектите со вештачка интелигенција во 2025 година не донеле значителен раст на приходите.

Аналитичарите предупредуваат дека, доколку не се случи сериозен технолошки пробив, постои ризик огромните инвестиции во вештачката интелигенција да се претворат во голем финансиски балон со пошироки економски последици.