Најголемите светски технолошки компании продолжуваат да инвестираат огромни средства во развојот на вештачката интелигенција, но сè повисоките трошоци и големиот пад на вредноста на акциите на производителите на чипови ги зголемуваат сомнежите за долгорочната исплатливост на овој бум, објавува американската телевизиска мрежа CNBC.
Според анализата на CNBC, повикувајќи се на податоци од „Голдман Сакс“, капиталните расходи на најголемите технолошки компании годинава би можеле да достигнат 765 милијарди долари, а следната година да пораснат на речиси 1,2 трилиони долари.
Компаниите веќе ги чувствуваат последиците од ваквото темпо на трошење. „Амазон“ ја зголеми прогнозата за капитални инвестиции на 220 милијарди долари и пријави негативен слободен паричен тек од 7,6 милијарди долари во последните 12 месеци. „Мета“ објави пад од 91 процент на готовинскиот тек во споредба со лани, додека „Алфабет“ за првпат регистрираше негативен паричен тек.
Една од главните причини за растот на трошоците е недостигот на меморија, предизвикан од огромната побарувачка за процесори за вештачка интелигенција. Тоа особено ги погодува компаниите како „Епл“, која веќе ги зголеми цените на компјутерите и таблетите, а аналитичарите очекуваат подоцна годинава да поскапат и моделите на „ајфон“.
Во меѓувреме, акциите на водечките производители на чипови претрпеа значителен пад. Според анализата на CNBC и платформата FactSet, 20-те највредни компании во секторот за чипови изгубиле околу 1,3 трилиони долари пазарна вредност за само неколку дена. Големи загуби забележаа компаниите „Nvidia“, „AMD“, „TSMC“, „Samsung“, „Micron“ и „SK Hynix“.
Мајкл Филд, главен стратег за акции во „Морнингстар“, оцени дека станува збор за губење доверба кај инвеститорите.
„Продолжуваме да гледаме раст кај многу компании поврзани со вештачката интелигенција, но голем дел од нивната вредност се темели на очекувани идни приходи, што бара високо ниво на доверба од инвеститорите“, изјави Филд.
Сличен став има и Чарли Деј од консултантската компанија „Форестер“, кој предупреди дека инвеститорите сè повеќе се прашуваат дали краткорочните приходи можат да ги оправдаат рекордните инвестиции во инфраструктура за вештачка интелигенција, особено во услови на засилена конкуренција во производството на чипови и развојот на ВИ-инфраструктурата.
