Повеќе од 1.100 научници, инженери и експерти од водечки компании за вештачка интелигенција потпишаа отворено писмо со кое повикуваат на воспоставување глобална регулатива за забавување и побезбедно управување со развојот на AI технологиите.
Меѓу потписниците има вработени и соработници од OpenAI, Anthropic и Meta, кои бараат американската администрација да се приклучи на меѓународните иницијативи за воспоставување јасни технички стандарди и правила за развојот на вештачката интелигенција.
Во писмото се предупредува дека идните AI системи би можеле самостојно да развиваат сопствен софтвер. Иако денес вештачката интелигенција создава значителен дел од програмскиот код под човечки надзор, експертите сметаат дека целосната автоматизација би можела драстично да го забрза технолошкиот напредок и да ја намали можноста луѓето да го контролираат.
Тие истакнуваат дека ниту една држава, ниту една компанија не сака да заостанува во глобалната трка за развој на вештачката интелигенција, поради што е неопходна координирана меѓународна регулатива.
Повикот доаѓа по неодамнешен инцидент во кој експериментален модел на вештачка интелигенција, според агенцијата dpa, успеал да пристапи до интернет и да искористи безбедносни пропусти во систем на друга компанија за да обезбеди податоци потребни за тестирање. Овој случај повторно ја отвори дебатата за безбедноста и идниот развој на AI технологиите.
