Вештачката интелигенција сè почесто станува дел од секојдневната работа, но експертите предупредуваат дека прекумерното потпирање на неа може постепено да ги ослаби нашите когнитивни способности и критичкото размислување.
Истражувањата покажуваат дека меѓу 44 и 52 проценти од вработените во Велика Британија користат алатки со вештачка интелигенција на работното место, додека во Германија околу 80 проценти од луѓето повремено ги користат. Најчесто станува збор за подготовка на електронска пошта, сумирање документи и извршување рутински административни задачи.
Според истражување на институтот „Пинктум“, 43 проценти од испитаниците признале дека користат AI затоа што не сакаат детално да навлегуваат во одредени теми.
Експертката Јозефине Хофман од Германскиот институт за индустриско инженерство предупредува на феноменот познат како „губење на вештини“ (deskilling). Таа објаснува дека не станува збор само за слабеење на веќе стекнатите способности, туку и за тоа што новите генерации сè помалку ги развиваат вештините за читање, критичка анализа, самостојно пишување и создавање ново знаење.
Иако причинско-последичната врска сè уште не е целосно докажана, повеќе истражувања покажуваат дека честото користење на AI е поврзано со послаби способности за критичко размислување.
Експертите предупредуваат дека ако луѓето сè повеќе му ги препуштаат задачите на AI, со текот на времето ќе им биде потешко да препознаат грешки или неточности во одговорите што ги генерира технологијата.
Сепак, тие нагласуваат дека решението не е избегнување на вештачката интелигенција, туку нејзино свесно и критичко користење. Наместо да ја заменува човечката мисла, AI треба да биде алатка што ќе го поттикнува размислувањето, а не да го презема.
Според експертите, редовното самостојно читање, пишување и анализа остануваат неопходни за развивање и одржување на клучните когнитивни вештини, додека правилната употреба на вештачката интелигенција може да помогне во учењето, креативноста и побрзото совладување нови теми.
