Додека сè уште се слегнува правот по спектакуларната американска операција „Полноќен чекан“, со која беа погодени клучни ирански нуклеарни објекти, нејзините последици веќе се чувствуваат и далеку од Блискиот Исток – дури до Москва. Тоа го оценува поранешниот британски офицер и експерт за хемиско оружје Хамиш де Бретон-Гордон во анализа за Телеграф, објавена под наслов: „Путина ќе го ужаси колку лесно падна руската противвоздушна одбрана на Иран“.
Операцијата, во која учествувале седум американски бомбардери B-2 и 75 крстосувачки ракети, со висока прецизност ги погодила подземните постројки во Фордо, Натанз и Исфахан, покажала не само технолошка супериорност на САД, туку и алармантна ранливост на иранскиот воздушен простор, кој беше заштитен со руски системи С-300.
За Русија, ова е аларм – и стратегиски пораз. Ако нивните системи не успеале да го заштитат Иран, што би се случило ако истото сценарио се преслика во Украина, или уште полошо – во самата Русија?
Во Украина, иако се води различен вид на воздушна војна, обете страни избегнуваат користење авиони над фронтот, и се потпираат на ракети и дронови, токму поради опасноста од ПВО. Но, американско-израелската демонстрација на сила покажува дека добро опремени армии можат да ги победат руските системи – и тоа лесно.
Иако Русија поседува понови системи како С-400 и С-500, многу воени аналитичари ги гледаат како надградени варијанти со преценета ефикасност.
За Кремљ, пораката е јасна: нивната одбрана е пробојлива, нивните воени цели следливи, а нивната безбедност и технолошка предност – мит. Украина веќе покажа способност да делува длабоко на руска територија, а напади како оние во операцијата „Пајакова мрежа“, при што беа уништени руски стратегиски бомбардери, само ја засилуваат грижата.
Соочени со фактот дека нивната противвоздушна одбрана не е толку непобедлива, руските генерали и политички лидери веќе сигурно ги преиспитуваат сите претпоставки – не само за Украина, туку и за идни воени конфликти со Западот.
