(Видео) Украинските дронови ја погодија руската нафтена индустрија: Капацитетите за преработка намалени за 30 отсто

Украинските напади со беспилотни летала врз руските рафинерии ја намалиле способноста на Русија за преработка на нафта за околу 30 отсто, тврдат два извора од нафтената индустрија.

Нападите дополнително ѝ ја отежнуваат на Москва борбата со недостигот на гориво на домашниот пазар, во период кога Русија испорачува дизел на меѓународните пазари во рамките на договорот со американскиот претседател Доналд Трамп.

— реклама —

Украина ги засили нападите врз руските рафинерии од крајот на октомври, откако договорот за прекин на нападите врз енергетските објекти не беше спроведен.

Според индустриски извори и официјални лица, во текот на изминатата недела нападите го нарушиле работењето на девет од 35-те главни руски рафинерии. Капацитетот на постројките погодени од крајот на октомври изнесува околу 300.000 тони нафта дневно, односно 2,2 милиони барели, додека вкупниот капацитет за примарна преработка во Русија е околу 930.000 тони дневно.

— реклама —

Изворите проценуваат дека реалното намалување на преработката може да достигне до 200.000 тони дневно. Меѓу погодените се рафинериите во Рјазан, Јарослав и во областите покрај реката Волга.

— реклама —

Во понеделникот украинско беспилотно летало ја погодило рафинеријата Кириши, втора по големина во Русија, предизвикувајќи пожар. Гувернерот на Ленинградската област соопштил дека во нападот загинала една жена.

Рускиот министер за надворешни работи Сергеј Лавров изјави дека Украина не ги почитува повиците на Трамп за прекин на нападите врз руските енергетски објекти.

— реклама —

Украинскиот претседател Володимир Зеленски, пак, минатата недела порача дека Киев ќе продолжи со нападите врз цели поврзани со рускиот нафтен сектор, како одговор на руските напади врз украинската енергетска инфраструктура. Тој посочи дека украинските електроцентрали, електроенергетската мрежа, системите за греење и водоснабдување се под постојани напади, а Москва одбила деескалација.