Над 450.000 загинати Руси во војната во Украина, протекоа податоци од руската агенција за статистика

Повеќе од 450.000 руски државјани загинале во војната во Украина, според податоци кои наводно протекле од руската државна агенција за статистика „Росстат“. Станува збор за едно од најзначајните откривања досега за руските загуби, објави „Москов тајмс“.

Русија последен пат официјално ги објави загубите на фронтот во септември 2022 година, а независните процени редовно ги отфрла како недоверливи. Доколку протечените податоци се точни, војната во Украина е најсмртоносниот вооружен судир за Русија од Втората светска војна, со далеку повеќе жртви од околу 13.000 советски војници загинати во деветгодишната војна во Авганистан.

„Росстат“ бил цел на кибернапад од 29 октомври до 1 ноември, зад кој, според објавените информации, стојат хакерските групи „Белоруски киберпартизани“ и „Silent Crow“. Тие наводно украле податоци за руската економија, демографијата и воените загуби, а на почетната страница на агенцијата оставиле свои пораки.

— реклама —

„Ова е досега најзначајното протекување податоци за руските жртви“, изјавил за „Москов тајмс“ Јанис Клуге од Германскиот институт за меѓународни и безбедносни прашања. Според него, податоците потврдуваат дека војната досега не била толку смртоносна како во сегашниот период.

Бројката од над 450.000 загинати, пресметана од групата „Silent Crow“, покрај активните војници ги опфаќа и цивилите загинати во воздушните напади за време на украинскиот упад во руската област Курск во 2024 година. Вкупниот број веројатно е и поголем, бидејќи во пресметката не се вклучени исчезнатите војници ниту околу 27.000 странски борци за кои се проценува дека биле регрутирани во руските вооружени сили.

— реклама —

„Москов тајмс“ проверил 50 случајно избрани имиња од базата на податоци што ја водат „Медиазона“ и руската редакција на Би-Би-Си, споредувајќи ги со податоците на „Silent Crow“. Сепак, не било можно целосно да се потврди автентичноста на целата база.

Бројките се совпаѓаат со други процени за руските загуби. Британското Министерство за одбрана на почетокот на септември објави дека повеќе од половина милион луѓе загинале борејќи се на руската страна, додека вкупниот број на загинати и ранети би можел да достигне 1,5 милиони.

— реклама —

Според објавените анализи, од почетокот на руската инвазија на Украина за секој освоен квадратен километар територија загинале по 6,2 руски војници. Цената на напредувањето, се наведува, постојано расте, бидејќи бројот на регистрирани смртни случаи се зголемува, иако напредувањето на руските сили на фронтот е забавено.

Истражувачката Марија Вјушкова предупредува и на нерамномерната распределба на регрутирањето. Според неа, политиката на Кремљ особено ги погодува некои од најмалите етнички заедници во Русија, за кои таа ја употребува оценката „истребување на цели народи“.

— реклама —

Клуге смета дека, и покрај драматичните бројки, загубите веројатно немаат големо непосредно влијание врз руската економија, бидејќи станува збор за околу половина процент од работоспособното население, кое брои 80 милиони луѓе.

Сепак, според него, главното значење на овие податоци е политичко, бидејќи отвораат прашања за цената што Русија ја плаќа во војната и за нејзините последици врз населението.