Повеќе од 850.000 луѓе во Украина останаа без струја по руските напади

Повеќе од 850.000 жители на Украина останале без електрична енергија по ноќните руски напади врз енергетската инфраструктура, соопшти украинската енергетска компанија ДТЕК.

— реклама —

Најголем број прекини биле регистрирани во Дњепропетровската област, каде што без струја останале повеќе од 600.000 жители во областите Павлоград, Самар, Камјанске и Дњепар, како и во самиот град Дњепар. Прекини имало и во Харковската и Житомирската област. Во Харков околу 250.000 корисници останале без електрична енергија, но снабдувањето во меѓувреме било обновено. Во Житомирската област, пак, 140 станбени згради останале без греење.

ДТЕК подоцна соопшти дека снабдувањето со електрична енергија во Дњепропетровската област постепено се нормализира.

— реклама —

Украинскиот претседател Володимир Зеленски објави дека руските сили во изминатата недела истрелале 115 ракети, речиси 1.900 наведувани воздушни бомби и повеќе од 3.000 нападни беспилотни летала врз Украина.

— реклама —

Зеленски во неделата соопшти и дека Русија повторно со беспилотни летала ја нападнала локацијата во Комишувака, каде што спасувачките екипи сè уште трагаат по преживеани. Во нападот врз ова место во понеделникот загинале најмалку 55 лица. Според украинската служба за вонредни состојби, руските сили намерно ги гаѓале спасувачите, но никој од нив не бил повреден.

Во одделен напад врз станбена населба во Дњепар во неделата загинало едно лице, а три биле повредени. Регионалните власти соопштија дека била уништена најмалку една приватна куќа и дека постои можност луѓе да останале затрупани под урнатините.

— реклама —

Зеленски го обвини Кремљ дека со засилените напади врши дополнителен притисок врз преговарачката позиција на Украина, во пресрет на најавените трилатерални разговори меѓу Киев, Москва и Вашингтон во Абу Даби.