По појавата на бела отпадна пена во реката Вардар кај вливот на реката Лепенец, надлежните институции спровеле вонредни инспекциски контроли и лабораториски анализи за да ја утврдат причината за загадувањето и состојбата на водата.
Од Државниот инспекторат за животна средина (ДИЖС) соопштија дека веднаш по регистрирањето на појавата на 24 јули започнале координирани активности со останатите надлежни институции.
Инспекторите извршиле вонредни контроли кај индустриските субјекти во зоната што се под државна надлежност, при што, како што информираат, не биле утврдени прекршувања на законските обврски. Според ДИЖС, субјектите работеле согласно со условите предвидени во еколошките дозволи за управување со отпадните води.
Од Инспекторатот посочуваат дека врз квалитетот на водата во овој дел од Вардар влијаат повеќе фактори, меѓу кои комуналните и атмосферските води, како и активностите на повеќе деловни субјекти во околината, поради што повеќе институции заеднички ја испитуваат состојбата.
ЈП „Водовод и канализација“ – Скопје земало мостри од водата и доставило прелиминарен извештај до Министерството за животна средина и просторно планирање. Според првичните анализи, физичко-хемиските параметри не ги надминале граничните вредности за испуштање во површински води.
По барање на ДИЖС, дополнителни примероци се анализираат и во акредитирана лабораторија. Конечниот извештај се очекува на 4 август, по што јавноста ќе биде информирана за резултатите.
Од Инспекторатот најавија дека ќе продолжат со редовни и вонредни инспекциски надзори со цел заштита на животната средина и здравјето на граѓаните.
