Андоновска до ДУИ: „Нема повеќе како и до сега“, тврди дека добива закани и притисоци

Директорката на Институтот за јавно здравје, Марија Андоновска, реагираше на обвинувањата од Демократската унија за интеграција (ДУИ) за наводно непочитување на Законот за употреба на јазиците во државните институции, порачувајќи дека нема да отстапи од воспоставувањето ред и одговорно работење во институцијата.

„ДУИ мора да знае дека нема повеќе ‘како и до сега’!“, напиша Андоновска во објава на социјалните мрежи.

— реклама —

Таа тврди дека мотивот за, како што ги нарекува, невистинитите обвинувања од ДУИ е воспоставувањето ред во Институтот за јавно здравје, како и јавното објавување на неправилности, криминал и расипничко однесување за кои вели дека се случувале со години, во периодот кога институцијата била раководена од кадар на ДУИ.

Андоновска во објавата наведува и дека континуирано добива закани и притисоци од различни нивоа од ДУИ, но нагласува дека тоа нема да ја обесхрабри.

— реклама —

„Законите важат подеднакво за сите, а редот и одговорното работење ќе продолжат, им се допаѓало тоа на ДУИ или не!“, порачува директорката.

— реклама —

Нејзината реакција следува откако ДУИ го обвини Институтот за јавно здравје за непочитување на Законот за употреба на јазиците. Од партијата тврдат дека директорката Марија Андоновска наредила службената комуникација да се одвива исклучиво на македонски јазик и дека двојазичните документи повеќе не се прифаќаат.

Потпретседателот на ДУИ, Аријанит Хоџа, изјави дека раководителите на секторите добиле инструкции да ги известат вработените дека како валидни ќе се сметаат само документите изготвени на македонски јазик.

— реклама —