Андоновски: 120% раст на трансакции на платформата за интероперабилност

Министерот за дигитална трансформација Стефан Андоновски изјави дека платформата за интероперабилност бележи околу 120% раст на бројот на трансакции, што, како што рече, покажува сè поголема употреба на дигиталните канали за размена на податоци меѓу институциите.

— реклама —

Тој ова го истакна на отворањето на Третата регионална конференција на сметководители и овластени сметководители, нагласувајќи дека дигиталната трансформација претставува суштинска промена во функционирањето на државата, бизнисот и граѓаните, а не само технолошки процес.

— реклама —

Андоновски посочи дека целта е намалување на административните бариери, помалку хартија и шалтери, како и елиминирање на потребата граѓаните и компаниите да доставуваат податоци што веќе постојат во институциите. Според него, податоците треба да циркулираат меѓу институциите, а не граѓаните.

— реклама —

Тој додаде дека интероперабилноста претставува и економска мерка, бидејќи придонесува за пониски трошоци, побрзи постапки и подобра деловна клима. Посебно го нагласи и значењето на Националниот портал за услуги, кој треба да биде централна точка за пристап до јавните услуги.

— реклама —

Во своето обраќање, Андоновски истакна дека дигиталната трансформација има реална вредност само кога граѓаните и компаниите директно ја чувствуваат преку поедноставени и побрзи услуги, а институциите преку меѓусебна размена на податоци.