Владините веб-страници заштитени од критичните пропусти во PHP

Веб-страниците на Владата и министерствата биле навреме заштитени од критичните безбедносни пропусти во програмскиот јазик PHP, соопшти Министерството за дигитална трансформација, откако беше предупредено дека хакери веќе се обидуваат да ги искористат ранливостите.

— реклама —

Од Министерството информираат дека првично привремено го блокирале надворешниот сообраќај кон засегнатите системи, а потоа ги провериле верзиите на софтверот, ги инсталирале потребните безбедносни ажурирања и ја тестирале заштитата на веб-серверите.

„Според досегашните проверки, не се утврдени индикации за успешно искористување на наведените ранливости или за компромитирање на веб-страниците на Владата и министерствата“, се наведува во соопштението од кабинетот на министерот Стефан Андоновски.

— реклама —

Министерството, преку Секторот за кибербезбедност и владиниот тим за компјутерска безбедност МКД-ГОВ-ЦСИРТ, продолжува да ги следи заканите и да проверува дали има знаци на неовластен пристап.

— реклама —

Од институцијата посочуваат дека заштитата на владината дигитална инфраструктура останува приоритет, со цел да се обезбеди сигурно и стабилно функционирање на електронските услуги за граѓаните и компаниите.

Безбедносните пропусти во PHP, програмски јазик што се користи за изработка и одржување на голем број интернет-страници, предизвикаа загриженост на меѓународно ниво. Повеќе владини институции и компании во Европа и во други делови од светот привремено ги исклучиле своите веб-страници поради опасноста од можни напади.

Компанијата за кибербезбедност „Виз“, која учествувала во откривањето на пропустите, проценува дека PHP се користи на околу 70 проценти од веб-страниците во светот. Од компанијата предупредуваат дека станува збор за едни од најсериозните безбедносни проблеми со кои се соочил овој програмски јазик.