Андоновски: Во октомври реализирани рекордни 20 милиони трансакции на платформата за интероперабилност

Платформата за интероперабилност во октомври забележала рекордна активност со 20 милиони реализирани трансакции, соопшти министерот за дигитална трансформација Стефан Андоновски. Тоа претставува речиси 650.000 трансакции дневно, додека во текот на 2024 година биле реализирани околу 700.000 месечно.

— реклама —

Андоновски истакна дека растот се забележува и во користењето на порталот за електронски услуги, каде што се регистрирани 30.040 услуги, надминувајќи го претходниот рекорд од 29.000 во септември. Меѓу најкористените се услугите достапни преку мобилната апликација m.Uslugi.

— реклама —

Министерот најави дека во текот на оваа недела се очекува да биде пуштена втората верзија на апликацијата, со дополнителни подобрувања. Според него, зголемениот број корисници и воведувањето нови услуги треба дополнително да го унапредат односот меѓу државата и граѓаните.

Говорејќи за посетата на Бон, Германија, каде што беше заедно со премиерот Христијан Мицкоски, Андоновски посочи дека разговорите во голем дел биле посветени на дигиталната трансформација. Притоа, имале можност да се запознаат со искуствата на „Дојче телеком“, особено во областа на сајбер-безбедноста.

— реклама —

Тој информираше дека компанијата располага со центар за сајбер-безбедност кој обезбедува услуги за компаниите во рамките на групацијата, но и за други клиенти во Европа и светот. Македонија, како што рече, се стреми да привлече слични инвестиции и да ги искористи знаењата и искуствата за развој на домашни компании во оваа област.

— реклама —

Целта е да се зајакнат капацитетите за сајбер-безбедност, особено кај малите и средните претпријатија, и да им се овозможи побезбедно да ги спроведуваат процесите на дигитална трансформација.