Андоновски од Импакт Букурешт: Со регионална соработка до повеќе инвестиции во вештачката интелигенција и подобра дигиталната инфраструктура

Регионалната соработка и заедничките вложувања во дигиталната инфраструктура може да им помогнат на земјите од Југоисточна Европа да привлечат повеќе инвестиции и побрзо да ја применат вештачката интелигенција, порача министерот за дигитална трансформација Стефан Андоновски од самитот „Импакт“ во Букурешт.

Андоновски втора година по ред учествува на самитот, каде што заедно со министри од Романија и Полска, пратеници во Европскиот парламент и претставници на водечки меѓународни компании од телекомуникацискиот и банкарскиот сектор дискутираше за иднината на вештачката интелигенција во Европа.

— реклама —

Говорејќи на панелот „Европската сувереност во вештачката интелигенција: може ли ЕУ да биде конкурентна и да предводи?“, Андоновски истакна дека конкурентноста на Европа ќе зависи од тоа колку успешно технологијата ќе се примени во економијата и јавниот сектор, но и од вложувањата во инфраструктурата и знаењето.

„За Југоисточна Европа, трката во областа на вештачката интелигенција не се сведува на тоа кој ќе го изгради најголемиот модел. Станува збор за тоа кој најбрзо ќе ја усвои вештачката интелигенција, ќе ја поврзе со реални проблеми во економијата и јавниот сектор и ќе им обезбеди на луѓето инфраструктура и вештини за натамошна надградба врз таа основа“, истакна Андоновски.

— реклама —

Според него, земјите од регионот поединечно имаат релативно мали пазари, но преку поголема соработка можат да понудат поширок регионален пазар, квалификуван инженерски кадар, конкурентни трошоци и развиена дигитална инфраструктура.

„Поединечно, нашите пазари се релативно мали. Заедно, можеме да им понудиме на инвеститорите регионален пазар, силен инженерски кадар, конкурентни трошоци и сè пософистицирана дигитална инфраструктура“, порача министерот, посочувајќи три области за соработка – заедничка инфраструктура, заеднички примери за примена и полесно движење на таленти и компании.

— реклама —

Андоновски се осврна и на европскиот пристап кон регулирањето на вештачката интелигенција, нагласувајќи дека правилата се важни за воспоставување доверба, но дека Европа треба да стави поголем акцент и на примената и иновациите.

„Европа веќе е лидер во областа на регулативата. Вистинското прашање е дали сега можеме да станеме и лидери во имплементацијата и иновациите“, истакна тој.

Според Андоновски, во следните пет години треба да се вложува во компјутерски капацитети, енергија, капитал и таленти, со цел технологијата да се применува пошироко и истражувањата побрзо да се претвораат во производи и компании.

Во рамки на самитот, Андоновски оствари и средба со претставници на регионалното раководство за Југоисточна Европа на „Mastercard“, меѓународна компанија за платежни технологии.