Андоновски: Размислуваме за закон за правилно и етичко користење на вештачката интелигенција

Владата и Министерството за дигитална трансформација размислуваат за донесување посебен закон со кој би се уредило користењето на вештачката интелигенција, најави министерот за дигитална трансформација Стефан Андоновски.

Како што објасни Андоновски, законот не би го регулирал производството или создавањето на вештачка интелигенција, туку начинот на кој технологијата се користи, со акцент на етичка и принципиелна употреба. Идејата е дел од националната стратегија за вештачка интелигенција, чија прва нацрт-верзија треба да биде презентирана утре од работната група.

— реклама —

Стратегијата ќе содржи и акциски план со конкретни задачи за институциите. Андоновски очекува таа да биде усвоена до крајот на годината, по објавувањето на Единствениот национален регистар на прописи и спроведувањето на неколку јавни расправи.

„Една од активностите на стратегијата ќе биде можеби, размислуваме за донесување еден закон за употреба на вештачката интелигенција, значи не за регулирање на производство или создавање на вештачка интелигенција, туку повеќе за правилното, етичко и принципиелно користење, за добро на вештачката интелигенција. Така што, тоа е нешто за што размислуваме за 2027 година“, изјави Андоновски.

— реклама —

Во однос на националниот центар за податоци, министерот информираше дека разговорите се во завршна фаза за избор на локацијата, како и за обезбедување меѓународен финансиски партнер за реализација на проектот.

— реклама —

Според Андоновски, центарот за податоци ќе биде изграден во близина на Скопје, непосредно до една технолошко-индустриска развојна зона. Локацијата, како што посочи, има соодветна енергетска и комуникациска инфраструктура, а во близина се изградени и фотонапонски централи.

„Во близина веќе се изградени фотонапонски централи; планираме и ние во втора фаза покрај центарот за податоци да изградиме фотонапонска централа, со која 30 до 40 проценти од потрошувачката на електрична енергија ќе ја искористиме од фотонапонската централа“, рече Андоновски.

Тој додаде дека во изминатите денови имал разговори со потенцијални финансиери, а Министерството за дигитална трансформација разговара и со Министерството за транспорт за потребните постапки поврзани со локацијата и подготовката на проектот.

Во јуни годинава Македонија официјално го промовираше проектот „Везилка“ – Национална фабрика за вештачка интелигенција, чија цел е создавање инфраструктура за развој на современи технологии, истражувања и иновативни решенија со примена на вештачката интелигенција.