Ангелов: Пожарникари биле нападнати додека гаснеле пожар кај Прилеп, сопственикот ги туркал и ги спречувал

Пожарникари кои пристигнале да гаснат пожар во објект во близина на Прилеп биле нападнати од сопственикот на објектот, кој со туркање во пределот на градите се обидел да ги спречи да продолжат со интервенцијата, соопшти директорот на Дирекцијата за заштита и спасување, Стојанче Ангелов.

Според Ангелов, инцидентот се случил вчера, кога првите двајца пожарникари со помало противпожарно возило пристигнале кај објект во кој се чувала поголема количина тутун. Сопственикот, како што вели, нервозно им се приближил и физички ги отстранувал, спречувајќи ги да продолжат со гаснењето.

— реклама —

Пожарникарите денеска го пријавиле случајот во полицијата, која работи на негово расчистување.

— реклама —

Ангелов апелираше до граѓаните да имаат разбирање за работата на пожарникарите и да не ги напаѓаат, навредуваат или да им се закануваат.

„Пожарникарите не се супермени. Тие можеби се храбри, можеби се пожртвувани, но не се супермени и не можат за минута да стигнат на секоја позиција каде што гори“, порача Ангелов.

— реклама —

Тој објасни дека од моментот на повикот до пристигнувањето на местото на пожарот потребно е време за екипите да се подготват, да ги стартуваат возилата и да пристигнат на локацијата. Дополнително, во исто време може да има повеќе пожари на територијата што ја покриваат локалните пожарникари, поради што екипите може да бидат распоредени на различни места.

Ангелов вели дека го разбира револтот на сопственикот, особено поради штетата предизвикана од пожарот, но нагласува дека неговото однесување не помогнало во надминувањето на ситуацијата.

„Почитувајте ги пожарникарите, дајте им поддршка и помогнете доколку можете“, апелираше директорот на ДЗС.