Повеќе од 31 пожар на отворен простор биле регистрирани во текот на вчерашниот ден, а според директорот на Дирекцијата за заштита и спасување (ДЗС) Стојанче Ангелов, дел од нив биле намерно предизвикани.
Ангелов посочи дека најголемиот број пожари настанале поради човечки фактор, главно како последица на небрежност, но постојат и случаи за кои има сомнежи дека биле подметнати.
Тој апелираше до граѓаните да го пријават секое сомнително однесување, особено оние кои живеат во подножјето на планината Китка, по Драчево, на територијата на Општина Студеничани.
„Имаме индиции дека токму тука одредена група намерно, секојдневно, повторно го распалува пожарот кој упорно се обидуваме да го изгаснеме“, рече Ангелов.
Во текот на денот на терен се ангажирани „ер трактори“ на Дирекцијата за заштита и спасување, како и полициски хеликоптери. Според Ангелов, на одредени делови е постигнат значаен напредок, а во моментот нема загрозени села во близина на пожарната линија.
Како особено успешна интервенција тој го издвои гаснењето на големиот пожар кој вчера избувнал меѓу селата Долно и Горно Чичево. Пожарот зафатил голема површина, претежно со сува трева, грмушки и трње, но пожарникарите доцна во ноќта успеале прво да го стават под контрола, а потоа и целосно да го изгаснат.
Во меѓувреме, активна е и депонијата во Кавадарци. На терен се присутни пожарникари, како и две возила БТР и едно возило на Дирекцијата за заштита и спасување, кои се подготвени да помогнат доколку биде потребно разладување на депонијата.
За состојбата со депонијата, Ангелов упати на локалната самоуправа за дополнителни информации.
