Опасноста од пожари на отворен простор и натаму е на многу високо ниво, а бројот на огнени жаришта е значително поголем од официјално регистрираните, предупреди директорот на Дирекцијата за заштита и спасување, Стојанче Ангелов.
„И во текот на вчерашниот ден имавме повеќе од 30 пожари на отворен простор. Ако на тоа ги додадеме и неколкуте десетици помали пожари што не ги вбројуваме во објавите преку ЦУК, тогаш бројот е значително поголем“, рече Ангелов.
Тој појасни дека во официјалните пресметки се земаат предвид поголемите пожари, додека пожарникарите голем број помали огнени жаришта успеваат да ги изгаснат уште во почетната фаза.
Ангелов апелираше до граѓаните да бидат исклучително внимателни, бидејќи температурите и натаму се високи. Тој информираше дека во моментот активни се повеќе пожари, меѓу кои и огнот што од косовска страна се проширил на македонска територија кај Грачани и Никиштани.
Пожарот вчера се приближил до селото Грачани, но бил запрен пред првите куќи со ангажман на скопските пожарникари и огнените тимови на ДЗС. Денеска пожарот се движи во насока на Никиштани, но, според Ангелов, таму се распоредени доволен број пожарникари и во моментов не претставува закана за селото.
Огнот може да се забележи и при патување кон Косово, пред граничниот премин, над реката Лепенец. Пожарот се шири на исклучително стрмен терен, а гори ниска смрека што создава силен пламен и густ чад, кој во одредени делови може да се почувствува и во Скопје. Во гаснењето се вклучени полициски хеликоптер и два „Ер трактори“ на ДЗС.
Ангелов се осврна и на пожарот во близина на селата Селци и Локов, на подрачјето меѓу Струга и Дебар. Тој вчера лично го посетил теренот и активирал тим за брз одговор на ДЗС, составен од доброволни пожарникари од Битола. Тимот ја поминал ноќта на терен, а рано утрово продолжил по линијата на огнот, заедно со екипа на „Национални шуми“.
„Очекувам во текот на денешниот ден овој пожар да биде целосно изгаснат, бидејќи се работи метар по метар, километар по километар“, рече Ангелов, додавајќи дека пожарот подолг период предизвикувал вознемиреност кај локалното население.
Активен пожар има и кај селото Белица во Општина Македонски Брод, на висока и тешко пристапна, а на одредени места и целосно непристапна територија. Ангелов очекува во текот на денот да биде воспоставена целосна контрола, додека пожарникарите од Македонски Брод работат на пресекување на огнените линии.
Утрово нов пожар избувнал и во селото Брезница, на подрачјето на ловиштето „Јасен“. Според Ангелов, жител кој повремено престојува во селото, при косење трева со машина предизвикал искрење, по што огнот брзо се проширил.
Веднаш бил испратен полициски хеликоптер, а како поддршка биле повикани и противпожарни екипи од Тетово, Скопје и Куманово. Сепак, први на терен пристигнале екипите од ловиштето „Јасен“, кои помогнале пожарот да биде ставен под контрола и да се заштитат лицата кои се наоѓале во селото.
Ангелов изрази благодарност до сите кои учествувале во гаснењето на пожарите и повторно апелираше до граѓаните на најголема внимателност.
„Доволна е само една искра за вистинска катастрофа“, предупреди директорот на ДЗС.
