Опасноста од пожари на отворен простор и натаму е висока, а во текот на вчерашниот ден биле регистрирани повеќе од 30 пожари, информира директорот на Дирекцијата за заштита и спасување (ДЗС), Стојанче Ангелов.
Тој посочи дека најголем дел од пожарите биле ставени под контрола и изгаснати благодарение на брзата реакција на локалните пожарникари и останатите служби кои учествуваат во гаснењето.
Во моментов активни се шест пожари, од кои неколку се посложени за гаснење. Меѓу нив е пожарот кај Рамно, на територијата на Општина Чучер-Сандево, каде што гори ниска вегетација, трева, папрат и трње, а на одредени места огнот навлегол и во шумскиот појас.
„Целиот пожар гори ниско по земјата, гори само лиснатата подлога и подлогата од трева“, објасни Ангелов.
Силниот ветер дополнително ја отежнува ситуацијата, а чадот се пренесува преку планината и може да се почувствува и во населените места кон Скопска Црна Гора.
На терен се ангажирани повеќе екипи на скопските пожарникари, тимови на ДЗС и припадници на Армијата. Во гаснењето учествува и полициски хеликоптер, кој дејствува на критичните точки.
Додека Ангелов ја даваше изјавата на терен, полицискиот хеликоптер прелета над него и исфрли вода за гаснење на пожарот, па директорот на ДЗС буквално беше „избањан“ со вода. Ситуацијата предизвика и интересен момент за време на неговото обраќање, додека хеликоптерот продолжи со дејствувањето врз пожарот.
Ангелов посочи дека теренот е исклучително непристапен и дека пожарот зафатил поголема површина, што го отежнува неговото целосно гаснење. Сепак, според него, огнот се движи ниско по земјата и се очекува да биде запрен.
Меѓу активните пожари е и оној кој веќе неколку дена е присутен во реонот на Грачани и Никитане. Ангелов информира дека пожарот се движи со намалено темпо и постепено ја губи силата.
