Апасиев со критики за дел од уставните судии: Празни чиновнички биографии и скромен правнички капацитет

Претседателот на Левица, Димитар Апасиев, упати остри критики кон актуелниот состав на Уставниот суд, оценувајќи дека дел од уставните судии имаат „чиновнички менталитет“ кој, според него, е неспоив со функцијата што ја извршуваат.

Во објава на социјалните мрежи, Апасиев ги спореди актуелните уставни судии со поранешните судии од времето на СФР Југославија, за кои оцени дека биле врвни правни авторитети.

— реклама —

„Колку ли само бедно изгледаат празните чиновнички биографии на некои од сегашните актуелни уставни судии со скромен правнички капацитет и никаква ерудиција, кога ќе се споредат со некои од поранешните уставни судии од времето на ‘тоталитарната’ и еднопартиска СФР Југославија“, напиша Апасиев.

Тој наведе дека меѓу поранешните уставни судии имало професори по римско, уставно, граѓанско, облигационо и меѓународно приватно право, кои, според него, претставувале доајени на македонската правна наука.

— реклама —

Во продолжение, Апасиев изнесе критики кон четворица актуелни уставни судии.

За претседателката на Уставниот суд, Добрила Кацарска, тој наведе дека како судија во Кривичниот суд била санкционирана од Уставниот суд, оценувајќи дека не успева да ја разбере улогата на оваа институција при одлучувањето за прашања од јавното право.

За уставната судијка Татјана Васиќ Божаџиева, Апасиев оцени дека има чиновничка кариера во државната администрација и дека е „далеку од правната теорија и доктрина“, при што се осврна и на нејзината имотна состојба.

— реклама —

Во објавата тој го спомена и уставниот судија Фатмир Скендер, за кого наведе дека претходно работел во Катастарот и бил секретар на Општина Центар Жупа, како и Насер Ајдари, за кого напиша дека во кариерата бил секретар на општина, вработен во Министерството за труд и социјална политика, јавен обвинител и државен правобранител.

Апасиев оцени дека актуелниот состав на Уставниот суд, наместо да биде медијатор, станал „генератор на државната изборна криза“, повторувајќи го ставот на Левица дека институцијата не ја извршува својата улога на начин што доликува на највисок суд за уставност и законитост во државата.