Апелација потврдила дека СДСМ клеветела кога кажала дека „Мицкоски е докажан криминалец фатен со рацете во медот“

Лидерот на ВМРО-ДПМНЕ, Христијан Мицкоски, соопшти дека Апелациониот суд со правосилна пресуда утврдил дека СДСМ изнесувала невистини и клевети против него, без докази и без правна основа.

— реклама —

„Со оваа одлука, по потврдената првостепена пресуда, СДСМ и формално е судски утврдена како клеветничка партија“, напиша Мицкоски, додавајќи дека тоа што со години било претставувано како „политичка борба“, сега е официјално констатирано како недозволено и спротивно на принципите на правната држава.

Според него, пресудата го разоткрива политичкиот модел на СДСМ, кој, како што наведува, се темели на напади и дискредитации наместо на аргументи, програми и одговорност.

— реклама —

„Политичката критика е легитимна и потребна, но клеветата и лагата не се политика, туку злоупотреба на јавниот простор“, истакна Мицкоски.

— реклама —

Тој додава дека одлуката на судот претставува „жесток шамар“ и за сите, како што ги нарече, поддржувачи и гласноговорници на СДСМ кои учествувале во ширење гласини и кампањи насочени против него.

Мицкоски оценува дека СДСМ свесно продолжува со, како што вели, лаги и манипулации, потценувајќи ги граѓаните и надевајќи се дека дезинформациите ќе имаат поголемо влијание од вистината.

— реклама —

„Македонија мора да оди напред со политика заснована на вистина, идеи и одговорност. Народот ќе покаже дека е посилен од ваквите лаги и дека тие нема да поминат“, порача Мицкоски.