Европа на удар на силно невреме: Откажани над 200 летови, илјадници луѓе евакуирани

Повеќе од 200 летови од и кон Португалија денеска се откажани, додека училиштата, стотици супермаркети и други деловни објекти се затворени поради невремето „Чарлс“, кое донесе обилни врнежи од дожд.

Иако невремето беше со послаб интензитет од првичните прогнози, португалската влада, која беше критикувана поради бавната реакција на серијата бури во јануари и февруари, презеде превентивни мерки.

— реклама —

Сите служби за итни случаи и воените единици се ставени во состојба на готовност. Наставата е откажана, работата на јавните служби кои не се од клучно значење е прекината, а граѓаните се повикани да останат во своите домови, пренесува агенцијата Луса.

— реклама —

Португалската метеоролошка служба ИПМА соопшти дека невремето над Атлантскиот Океан се поделило на два дела, по што ослабнало пред да стигне до јужниот регион Алгарве.

Командантот на португалската Служба за цивилна заштита, Марио Силвестре, изјави дека властите и натаму одржуваат високо ниво на подготвеност поради опасноста од поројни поплави, силен ветер и високи бранови. Од полноќ биле регистрирани 538 инциденти.

Олујата „Чарлс“ веќе го погоди архипелагот Мадеира, каде што предизвика поплави во одредени области и собори дрвја.

— реклама —

Португалија и Шпанија од неделата се погодени и од обилни дождови предизвикани од невремето „Бруна“. Поплави се регистрирани во неколку области, вклучително и во сообраќајните тунели во Лисабон, кои денеска главно беа затворени.

— реклама —

Се очекува новото невреме попладнево да пристигне и во југозападна Шпанија. Шпанската метеоролошка служба АЕМЕТ предупреди на сериозни последици од обилните врнежи, силниот ветер и високите бранови, кои дополнително би можеле да ја влошат состојбата предизвикана од бурата „Бруна“.

Во централна Шпанија, повеќе од 3.000 жители на местото Пједралавес беа евакуирани во вторникот и ги напуштија своите домови поради опасност од излевање на локалната брана.