Истражување: Ковид може да предизвика намалување на масата на мозокот и сивата маса
Ковид-19 може да предизвика намалување на масата на мозокот, да ја намали сивата материја во областите што ги контролираат емоциите и меморијата и да ја оштети областа што го контролира сетилото за мирис, според студијата на научниците од Универзитетот Оксфорд.
Истражувачите објавија дека забележале такви промени и кај пациенти кои не биле хоспитализирани поради Ковид-19. Ќе бидат потребни понатамошни истражувања за да се утврди дали овие ефекти можат барем делумно да се поништат или да станат трајни.
Во просек, големината на мозокот на испитаниците се намалила на 2 проценти.
„Имаме силни докази за абнормалности на мозокот по Ковид-19“, напишаа британските научници во студијата објавена вчера во списанието Nature.
Дури и во случај на благи форми на болеста, кај учесниците во студијата беа откриени „влошени извршни функции“ на мозокот, одговорни за фокусирање, планирање, организирање, донесување одлуки и решавање проблеми, а просечната големина на мозокот се намали меѓу 0,2 проценти и 2 проценти.
Една рецензирана студија испитувала промени во мозокот на 785 пациенти на возраст од 51 до 81 година. Двапати им е направено скенирање на мозокот, а од вкупниот број на испитаници, 400 биле заразени со Ковид помеѓу двете снимки. Второто скенирање беше направено во просек 141 ден по првото.
Некои пациенти страдале од „мозочна магла“
Студијата беше спроведена во време кога „алфа“ беше доминантна варијанта во Британија и малку е веројатно дека биле вклучени пациенти заразени со делта, велат британските научници.
Истражувањето исто така покажа дека некои пациенти страдале од „мозочна магла“ или намалено внимание и концентрација, како и намалена брзина на обработка на информациите и послаба меморија откако заболеле од Ковид.
Научниците не објавија дали вакцинацијата против Ковид влијаела на состојбата, но британската здравствена агенција минатиот месец објави дека студијата на 15 претходни студии покажала дека вакцинираните луѓе имаат половина помала веројатност да развијат долгорочни симптоми на Ковид од невакцинираните.
