Захарова: ЕУ продолжува упорно да се турка во ќорсокак
Портпаролката на Министерството за надворешни работи на Русија, Марија Захарова оцени дека новиот пакет санкции на Европската унија против Русија е нелегитимен.
Таа додаде дека обидот за притисок врз Москва нема перспектива.
„Советот на ЕУ објави дека ги проширил нелегитимните еднострани санкции против Русија. Така, Европската унија продолжува да се турка во ќорсокак со завидна упорност“, рече таа.
Според неа, „во средината на повеќегодишната политика на притисок врз Русија, која нема перспектива и е залудна, катастрофалните последици од санкциите на СС врз различни сегменти на глобалната економија и безбедност, вклучително и земјите членки на Европската унија, стануваат се поизразени“, пренесува Спутник.
Таа додаде дека Советот на ЕУ уште еднаш се обиде да ја отфрли одговорноста за провокациите и влошувањето на глобалната криза со храна и енергија.
„Сепак, фактите зборуваат сами за себе. Освен пандемијата на ковид, главната причина за поскапувањето на агроиндустријата и цените на јаглеводородите е кратковидната економска и енергетска политика на Западот. Антируските санкции на Европската унија, чија цел е да ги поткопаат надворешните економски активности на нашата земја, придонесуваат за влошување на состојбата, вклучително и агроиндустрискиот сектор“, објасни Захарова.
Таа потсети дека ЕУ воведе индивидуални санкции против акционерите и менаџментот на водечките руски производители и извозници на ѓубрива.
Според неа, директна задача на санкциите е да се ограничи употребата на готовина на банкарските сметки во ЕУ и пошироко и неможноста за слободен транзит на стоки низ територијата на земјите-членки на ЕУ.
